Adamson kakasa sa La Salle sa Final 4 | Pilipino Star Ngayon

MANILA, Philippines — Haharapin ng Adamson University ang defen­ding champion De La Salle University sa semifinals matapos kaldagin ang University of the East sa knockout playoff ng UAAP Season 87 collegiate men’s basketball tournament na nilaro sa Mall of Asia Arena sa Pasay City kagabi.

Nakumpleto ang teams sa Final Four matapos gumapang ang Soaring Falcons mula sa 3-7 record sa 6-8 karta pagkatapos ng 18-game elimination round.

Kinapitan ng Soaring Falcons sa opensa sina Cedrick Manzano at Matthew Montebon upang isampa sa semifinals ang koponan at harapin sa susunod na laro ang defending champions at top seeded De La Salle University.

Kumana si Manzano ng 14 points para sa San Marcelino-based squad upang pahabain ang losing streak ng UE sa pito.

Dominado agad ng Adamson ang laban sa unang dalawang periods, nakalamang sila ng siyam na puntos, 39-30 sa halftime.

Maglalaban sa isa pang semis match ang No. 2 University of the Philippines at No. 3 University of Sto. Tomas na magsisimula sa Sabado.