Belangel nikulit og career high 36 points sa Korean league | Banat

CEBU, Philippines — Mipabuto si SJ Belangel aron pagkulit og career-high 36 points aron pangulohan ang Daegu KOGAS Pegasus batok sa Seoul Samsung Thunders, 114-77, sa Korean Basketball League didto sa Jamsil Indoor Gymnasium.

Ang kanhi Ateneo Blue Eagle nanginit og maayo ug mipupo og 12 sa iyang 17 ka itsa  ug ingon man unom sa iyang napulo gikan sa ilawom, nga gibulakan og walo ka assists, tulo ka steals ug tulo ka rebounds.

Ang Daegu milabaw lang og dos puntos, 25-23, sa first quarter.

Apan miarangkada si Belangel, nga nakapagana sa iyang mga kauban aron biyaan ang Seoul 63-35 sa second ug third quarters ug gikan didto misutoy na ang ilang pag-abante hangtud natapos ang duwa.   

Si Andrew Nicholson niamot og 22 puntos para sa KOGAS, samtang si Youssopha Ndoye mitampo sab og 18 puntos ug12 ka rebounds.   

Samtang ang ilang kaatbang gipangunahan ni Junghyun Lee nga nipupo og 21 puntos, upat ka assists ug duha ka rebounds.

Ang pag-init ni Belangel maoy nagtimon kanila balik sa kadaugan human sila napildi batok sa Ulsan Hyundai Mobis sa kataposang duwa sa tuig 2024.

Ang Ulsan mipukan sa Daegu, 88-81, nga gitampohan ni Belangel og 23 points ug tulo ka assists. Sa maong duwa, ang Pinoy import milangkat og lima sa iyang siyam ka 3-pointers.

Tungod sa maong kadaugan, miinat ang rekord sa Pegasus 14-10 win-loss record samtang ang Samsung natagak 7-17. — Philstar.com/IBM