Talaw ug palusot | The Freeman
Gawas nga nikakak sa impeachment ni Bise Presidente Sara Duterte, nilikoy sab ang mga kongresista sa gikuwestiyon nga mga transaksiyon sa Office of the Vice President (OVP) ug sa Department of Education (DepEd) nga ubos sa iyang pagdumala sulod sa duha ka tuig.
Wala na maghisgot ni Duterte ang House Committee on Good Government, nga maoy nakahipos sa mga ebidensiya sa pataka nga gasto sa ?612.5 milyones nga confidential funds (CF) sa OVP ug DepEd. Bag-o nilang target mao na sab ang mga bulilyaso sa Philippine Health Insurance Corp. (PhilHealth).
***
Ahat nga gitapos sa mga kongresista ang imbestigasyon sa CF ni Duterte dayong tapos sa niaging tuig. Wala na gani nila ipatawag ang duha ka opisyal sa Vice Presidential Security and Protection Group (VPSPG) nga giila sa mga sinaligan ni Duterte nga maoy nagbuot giunsa paggasto ang CF.
Ambot nganong nikalit lang og kurog ang komitiba sa pag-imbestigar nilang Koronel Raymund Dante Lachica ug Koronel Dennis Nolasco sa VPSPG. Nipalusot na lang nga itugyan nila sa Armed Forces of the Philippines (AFP) ang pagsukitsukit sa duha ka opisyal.
***
Nisaad ang mga kongresista nga sunod nilang susihon ang mga gasto ni Duterte ginamit ang regular funds sa OVP ug DepEd, nga utro sang gibaraw sa Commission on Audit (COA), apil nang ipabalik nga ?12.3 bilyones sa DepEd.
Gawas nga nabugnaw sa impeachment, napawong ang tanang interes sa mga kongresista sa pagpaningil ni Duterte. Morang mga pahoy nga niyango sa pagkausab sa tuno nilang Presidente Ferdinand Marcos Jr. ug House Speaker Martin Romualdez.
***
Wala katabang ang ilang lipatlipat. Giapiki nilang PhilHealth, uban ang panghinaot nga makahipos og mga ebidensiya sa pag-usik-usik, aron pagtabon sa eskandalo sa ilang pag-blangko sa subsidy sa ahensiya karong tuiga.
Walay nakatambag nga mosamot lang ang ilang atraso. Ang tinuod nga naigo sa ilang maniobra sa 2025 budget dili ang banga ug kurakot nga mga tagdumala sa PhilHealth. Kon dili ang labing masakiton ug labing tabanganan nga mga pasyente sa tibuok nasud. Nga nameligrong mabalibaran. Kay gibalhin sa bicameral conference committee ang subsidy sa PhilHealth ngadto sa pork barrel. Nga ilang gamiton pagpanikas sa eleksiyon karong
