Tatum itinakas ang Celtics sa Pelicans | Pilipino Star Ngayon
NEW ORLEANS — Isinalpak ni Jayson Tatum ang isang jumper sa huling 0.7 segundo laban kay CJ McCollum sa 118-116 pag-eskapo ng nagdedepensang Boston Celtics kontra sa Pelicans.
Tumapos si Tatum na may 27 points habang may 28 markers si Jaylen Brown para sa Boston (34-15).
Bagsak ang New Orleans (12-37) sa pang-limang sunod na kamalasan kasama ang pagkakaroon ni star guard Dejounte Murray ng lower right leg injury sa first quarter.
Itinabla ni McCollum ang Pelicans sa 116-116 mula sa kanyang basket sa huling 24 segundo ng fourth quarter.
Kasunod nito ay ang game-winning jumper ni Tatum laban kay McCollum para sa panalo ng Celtics na nakahugot kina Kristaps Porzingis at Derrick White ng tig-16 points.
Sa San Antonio, humakot si Victor Wembanyama ng 30 points, 14 rebounds at 6 blocks para igiya ang Spurs (21-24) sa 144-118 paglampaso sa Milwaukee Bucks (26-20).
Sa Philadelphia, kumolekta si Nikola Jokic ng 28 points, 13 assists at 9 rebounds sa 137-134 pagtakas ng Denver Nuggets (29-19) sa 76ers (19-28).
Sa San Francisco, naglista si Devin Booker ng 31 points at 11 assists habang may 19 markers si Kevin Durant sa 130-105 pagsunog ng Phoenix Suns (25-22) sa Golden State Warriors (24-24).