Team PHL palaban sa Harbin Games--Tolentino | Pilipino Star Ngayon
MANILA, Philippines — Tiwala si Philippine Olympic Committee (POC) president Abraham “Bambol” Tolentino sa magiging laban ng pambansang delegasyon sa 9th Asian Winter Games na gaganapin sa Harbin, China.
Umaasa si Tolentino na kaya ng Pinoy athletes na makapag-uwi ng medalya sa naturang torneo.
“I believe our winter sport athletes can deliver, not in terms of medals, but in terms of the exposure and experience that’s needed as we also put weight on our thrust for the Winter Olympics,” pahayag ni Tolentino.
Nakatakdang umalis ngayong araw ang 20-member Team Philippines sa pangunguna ni Tolentino.
Gaganapin ang opening ceremony sa Biyernes sa Harbin International Convention Exhibition and Sports Center at magtatapos sa Pebrero 14.
Ang delegasyon ng Pilipinas sa edisyong ito ang pinakamarami sa nakalipas na pagsabak ng Pinoy squad sa torneo.
Hindi pa man nagsisimula ang laban, nabawasan na agad ang Team Philippines matapos magtamo si snowboarder Adrian Lee Tongko ng injury sa tuhod habang nasa training camp ito sa Hakuba, Japan.
Naiwan sa listahan sina Francis Ceccarelli at Tallulah Proulx sa slalom Alpine skiing, Laetaz Amihan Rabe sa free ski slopestyle, big air at halfpipe ng snowboarding at sina short-track speed skater Peter Groseclose, figure skating pair nina Isabella Gamez at Alexander Korovin, at figure skaters Paolo Borromeo, Cathryn Limketkai at Sofia Frank.
Pasok din ang men’s curling team nina Benjo Delarmente, Alan Frei, Christian Haller, Enrico Pfister at Marc Pfister at ang women’s squad nina Anne Bonache, Kathleen Dubberstein, Leilani Dubberstein, Sheila Mariano at Jessica Pfister.
May 1,275 athletes mula sa 34 bansa ang sasabak sa 64 events sa 11 sports—alpine skiing, biathlon, cross country, curling, figure skating, freestyle skating, ice hockey, short track speed skating, ski mountaineering, snowboarding at speed skating.