Choco Mucho sibak sa PLDT | Pilipino Star Ngayon

MANILA, Philippines — Kumpleto na ang eight-team quarterfinal cast ng 2024 Premier Volleyball League (PVL) Reinforced Conference.

Sinibak ng PLDT ang Choco Mucho Flying Titans, 21-25, 25-18, 25-16, 25-19, na nagbigay sa Farm Fresh ng No. 8 ticket sa knockout quarterfinals kahapon sa FilOil EcoOil Centre sa San Juan City.

Isinara ng High Speed Hitters ang elimination round bitbit ang 6-2 baraha para upuan ang No. 4 seat katapat ang No. 5 Chery Tiggo Crossovers sa quarterfinals, habang lalabanan ng No. 8 Foxies ang No. 1 Akari Chargers.

“Siguro nu’ng last game namin ang preparation namin based sa past games ng Chery noong time na iyon,” ani coach Rald Ricafort. “Siguro this Tuesday, at least na-try na namin. So aaralin namin iyong ngayon at iyong naging game din namin.”

Talsik ang Flying Titans (2-6) na naglaro na wala sina coach Dante Alinsunurin, kasama ng Alas Pilipinas men’s team sa Indonesia, at ang may sakit na si Greek import Zoi Faki.

Humataw si Russian import Lena Samoilenka ng 30 points tampok ang 27 attacks para sa PLDT.

Pinamunuan ni Dindin Santiago-Manabat ang Choco Mucho sa kanyang 22 points.

Samantala, winalis ng Creamline ang sibak nang ZUS Coffee, 25-17, 25-15, 25-22, para sikwatin ang No. 3 berth kaharap ang No. 6 Capital1 Solar Energy.

“Ang importante lang talaga is iyong determination namin na manalo,” ani Cool Smashers’ coach Sherwin Meneses na nakahugot kay American import Erica Staunton ng 17 points.