CSB, JRU umiskor | Pilipino Star Ngayon

MANILA, Philippines — Pinigilan ng College of Saint Benilde ang kanilang two-game losing skid matapos gibain ang San Sebastian College-Recoletos, 87-72, sa NCAA Season 99 men’s basketball tournament kahapon sa Filoil Centre sa San Juan City.

Nagpasabog si Miguel Oczon ng 29 points para tulungan ang Blazers na iposte ang 2-3 baraha, samantalang lugmok naman ang Stags sa 1-3.

Umiskor si Robi Nayve ng 16 markers kasunod ang 13 points ni Will Gozum para sa St. Benilde na kinuha ang five-point lead, 64-59, sa pagsasara ng third period bago tuluyang iwanan ang Baste sa fourth quarter.

Sa unang laro, umiskor si Shawn Argente ng team-high 17 points para igiya ang Jose Rizal University sa 71-65 panalo sa University of Perpetual Help System DALTA.

Sinolo ng Heavy Bom­bers ang second spot sa kanilang 4-1 baraha sa ilalim ng lider na Lyceum Pirates (5-0) habang nahulog ang Altas sa 1-3 marka.

Pinuri ni St. Benilde coach Louie Gonzales si Argente na nagsalpak din ng limang three-point shots para saluhin ang trabaho ni star player Agem Miranda na nalimitahan sa anim na marka.

“We played as a team and were not too reliant on Agem to score,” pagtukoy ni Gonzales kay Miranda.

Naagaw ng Altas ang 57-56 lead sa gitna ng fourth quarter mula sa 49-52 agwat sa pagtiklop ng third period bago nabawi ng Heavy Bombers ang trangko sa likod ng inihulog na 8-0 bomba para sa kanilang panalo.