Galanza muntik nang sumuko | Pilipino Star Ngayon

MANILA, Philippines — Dahil sa kabiguang ma­walis ang elimination round bunga ng paglakas ng ibang koponan ay minsan nang naisip ng Creamline team na sumuko.

Inamin ito mismo ni Je­ma Galanza.

“Talagang umabot kami sa point na parang hindi na kami aabot ng semis, parang hindi na kami aabot ng Finals,” litanya ni Galanza.

“Pero sa lahat ng mga pag­subok at napagdaanan namin, nakita ko sa mga teammates ko na wala ta­­lagang sumuko. Walang nag­kukuwestiyon sa amin,” dagdag ng outside hitter.

Ang resula nito ay ang 2-0 sweep ng Cool Sma­shers sa utol na Choco Mu­cho Flying Titans sa ka­nilang best-of-three championship series para pag­reynahan ang 2024 PVL All-Filipino Conference.

Hinirang ang 26-anyos na si Galanza bilang Finals Most Valuable Player.

Sa 24-26, 25-20, 25-21, 25-16 panalo ng Creamline sa Choco Mucho sa Game One ay humataw ang da­ting kamador ng Adamson Lady Falcons sa UAAP ng 20 points.

Umiskor din ng 20 mar­kers si Galanza sa 20-25, 25-20, 22-25, 25-22, 15-11 paggupo ng Cool Sma­shers sa Flying Titans sa Game Two para kumpletu­hin ang finals sweep.

Ayon kay Galanza, mas malawak na ngayon ang eksperyensa ng Creamline.