Gymnastics at weightlifting sa UAAP at NCAA | Pang-Masa

MANILA, Philippines —  Kinatigan ng Philippine Sports Commission (PSC) ang plano ng University Athletics Association of the Philippines (UAAP) at National Collegiate Athletic Association (NCAA) na idagdag ang gymnastics at weightlifting sa kanilang mga events.

Ito ay matapos na rin ang dalawang gold me­dals na kinuha ni gymnast Carlos Yulo sa nakaraang 2024 Olympic Games sa Paris, France.

Ang kauna-unahang Olympic gold ng Pilipinas ay binuhat naman ni weightlifter Hidilyn Diaz sa Tokyo, Japan noong 2021 Olympics.

“I spoke with the UAAP and NCAA, it’s about time we grow our sports. It shouldn’t take to win a medal to introduce another sport in the UAAP and NCAA,” wika ni PSC chairman Richard Bachmann.

Nauna na ring hiniling ni Diaz sa UAAP at NCAA na isama sa kanilang mga events ang weightlifting kung saan may tsansa ang mga Pinoy athletes na manalo sa mga international competitions.

Ang mga kagaya nina Yulo, Diaz at 2024 Paris Olympics bronze meda­lists Nesthy Petecio at Aira Villegas ng boxing ay mga produkto ng grassroots development program ng PSC.

Kaya itutuloy ng sports agency ang pagpapalakas sa kanilang programa.

Ang mga programa ng PSC ay kinabibilangan ng Batang Pinoy at Philippine National Games na nakatakda sa Disyembre.