Human gipayaka ang defending champion FADI Batch 2021 nakatilaw og pilde pinaagi sa default | Banat

CEBU, Philippines — Ang FADI Batch 2021 nakasustinir sa ilang kainit human gipukan ang Nest Workspaces Batch 2013, 87-82, sa sangka tali sa way pildeng mga koponan sa Sacred Heart Ateneo Alumni Basketball Athletic Association (SHAABAA) Season 27 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue niadtong Miyerkules sa gabii, Hunyo 19.

Apan imbes magkupot og 5-0 nga baraha, ang Batch 2021 natagak ngadto sa 4-1 sama sa defending champion Batch 2013 aron saw-an nila ang liderato sa Division C.

Pipila ka oras human gipiog ang Batch 2013, ang Batch 2021 nakatilaw sa una nilang pilde - pinaagi sa default batok sa Cebu Landmasters/CloudKart Batch 2014 sigun sa deklarasyon ni SHAABAA commissioner Atty. Jesus "Boyet" Velez kahapong adlawa (Huybes, Hunyo 20).

Ang Batch 2021 midaog sa maong duwa pinaagi sa sikit nga desisyon, 55-53, niadtong Hunyo 16 apan ang Batch 2014 miduso dayon og protesta ngadto ni Velez tungod sa kapakyas sa Batch 2021 pagpaduwa sa tulo niini ka mga players nga anaa sa ilang bench.

Usa kini ka kalapasan sa 2024 SHAABAA Rules and Regulations ubos sa Rule IV, No. 1 nga nagmando nga ang tanang players nga mitunga sa duwa kinahanglan nga paduwaon gyud.

Sa ilang tubag, ang Batch 2021 pinaagi sa team captain nilang si Rey Marcus Fuentes IV mi-angkon nga nakahimo sila og kalapasan sa mga lagda sa liga ug dili na mosupak pa sa protesta. Tungod niini, ang SHAABAA Technical Committee nga gipangulohan nilang Velez ug Chief of Referees Rey Cañete nakahukom nga ideklara ang Batch 2021 nga pilde pinaagi sa default batok sa Batch 2014 gawas nga ila kining gipamulta og P5,000.

Samtang namantsahan ang kanhi perpektong rekord sa Batch 2021, ang Batch 2014 misaka sa ikatulong dapit sa standings bitbit ang 3-1 nga marka. (BANAT NEWS)