Lady Strikers nagpasolido sa semis bonus sa MPVA | Pilipino Star Ngayon

LUCENA CITY, Philippines — Pina­lakas ng Bacoor ang tsansa para sa semifinals bonus matapos ang 25-20, 27-25, 25-23 pagwalis sa Negros sa Maharlika Pilipinas Volleyball Association (MPVA) Season 1 kahapon dito sa Quezon Convention Center.

Itinaas ng Lady Stri­kers ang kanilang baraha sa 9-2 para palakasin ang pag-asa sa ‘twice-to-beat’ incentive sa women’s regional volleyball tourney na itinatag ni dating Senator at MPBL chairman Manny Pacquiao.

Bagsak ang Lady Blue Hawks sa 4-7.

Solo ng Bacoor ang third spot sa ilalim ng Quezon (10-1) at Rizal (10-3)  sa nine-team upstart volleyball league.

Humataw si middle blocker Winnie Bedana ng 12 points para sa Lady Strikers.

Matapos kunin ng Bacoor ang 2-0 abante ay sumandal naman ang Neg­ros kina Cosme, Lopez, Marjorie Orpilla at Jehiel Moraga para agawin ang 20-19 bentahe sa third set.

Itinabla ni Bustamante ang Lady Strikers sa 21-21 patungo sa 24-23 kalamangan.

Ang matulis na palo ni Bedana ang tuluyan nang tumapos sa Lady Blue Hawks sa torneong suportado ng mga sponsors na Extreme One-Stop Shop Appliances, ASICS, Mikasa at Gerflor kasama ang mga broadcast partners  na MPTV at Outcomm at inorganisa ng Volleyball Masters of the Philippines.