Marcos pinakiusapan na sipain na ang POGO sa Pinas | Pang-Masa

MANILA, Philippines — Hiniling ni Senador Joel Villanueva kay Pa­ngulong Ferdinand Marcos Jr. na ipag-utos na ang pagsipa ng Philippine Offshore Game Operators (POGOs) sa bansa.

Ang panawagan ay ginawa ni Villanueva sa paggunita ng Pilipinas sa ika-126 na Araw ng Kalayaan, kahapon.

“Panahon na para magkaroon ng matatag na paninindigan ang ating gobyerno tungkol dito.Sipain natin ang mga POGO na ito minsan at para sa lahat. Ipagdiwang natin ang ating kalayaan sa pamamagitan ng pag­dedeklara ng ating bansa na malaya sa tanikala ng pagsusugal at lahat ng masamang epekto nito,” ani Villanueva.

Ipinunto ni Villanueva, na patuloy na bagama’t bumaba ang bilang ng mga lisensyadong operator, patuloy na dumarami ang mga walang lisensyang ope­rators at patuloy din ang pagdami ng mga krimeng may kinalaman sa POGO.

Sinabi ng senador na mula sa Day 1, hindi handa ang Philippine Amusement and Gaming Corporation (PAGCOR) na i-regulate ang operasyon ng online gambling ventures.

Hinimok din ni Villanueva ang kanyang mga kasamahan sa Senado na suportahan ang nakabinbing committee report sa pagbabawal ng mga POGO sa bansa, at pabilisin ang pagpasa ng Senate Bill No. 1281 o ang Anti-Online Gambling Act, na naglalayong ipagbawal ang lahat ng uri ng pagsusugal online. at ang paglalagay ng mga taya o taya sa pamamagitan ng internet.