Mga teams sa Pulpogan naka-una sa 14th Alegado Cup semis | Banat

CEBU, Philippines — Giharos og daog sa mga teams sa Barangay Pulpogan ang pasiuna nilang duwa sa best-of-three semifinals sa 14th Mayor Teresa “Nene” P. Alegado Cup Fiesta Basketball League didto sa Consolacion, Cebu.

Si Rexon Moneva mipabuto og 39 puntos samtang sila si James Saliot ug Harold Javier nagkumbinar og 30 puntos sa dihang gilampaso sa Pulpogan ang Lamac, 100-78, aron pagtikang ngadto sa usa na lang ka daog gikan sa seniors division finals.

Sa laing bahin, si Benson Culango mipaulbo og 40 puntos sa dihang gitagak sa Nangka ang Tayud, 115-80, aron pamartsa ngadto sa semis diin ilang sangkaon ang Jugan.

Sa midget category, si Kenth Garieth Avila mipupo og 23 puntos samtang sila si Arne Infante ug James Osabel nagkumboya'g 32 puntos sa dihang gibugha sa Pulpogan ang Lamac, 100-86, aron pagpanoktok sa finals.

Wala sab magpa-alkansi ang Jugan nga mipayaka sa Cabangahan, 80-75, sa buena manong duwa sa kaugalingon nilang serye.

Si John Jeffrey Broa maoy nangu sa Jugan uban ang 23 puntos. Dako sab og naambag sila si James Clet Rosell ug Brian Catandijan nga mitali og 15 ug 12 puntos.

Sa SK category, sila si Jovel Quinto, Kian Mission, ug Vinz Daog nakatigum og 42 puntos sa dihang ang Pulpogan mipaduol sa kampiyonato human gilampornas ang Pitogo,     99-71.

Si John Kervin Garcia mikadlit og 24 puntos samtang sila si Hever John Oquias ug Adrian Panangin miamot og 17 ug 15 puntos sa dihang gipakaging sa Cabangahan ang Casili, 102-85, aron pagposte og 1-0 nga bentaha sa laing SK Final Four match-up.