Perpetual nagdomina sa NCAA Season 99 events | Pilipino Star Ngayon

MANILA, Philippines — Inangkin ng University of Perpetual Help System DALTA ang siyam na korona sa pitong sports events ng NCAA Season 99.

Limang sports ang pinagharian ng Altas sa men’s indoor volleyball, women’s table tennis, women’s soft tennis, men’s chess at men’s beach volleyball na binanderahan nina Louie Ramirez at Jeff Marapoc.

Nanguna naman ang juniors’ team ng Perpetual sa girls’ indoor volleyball, 3x3 basketball, boys’ table tennis at track and field para sa kanilang back-to-back sa likod ni Rookie of the Year at Season MVP Marvin Ramos.

Humakot ang Junior Altas ng kabuuang 804.5 points sa 18 events para angkinin ang kanilang ikalawang sunod na titulo kasunod ang Jose Rizal Light Bombers (657.25 points) at Arellano Braves (503 points).

Tumapos sa runner up ang Perpetual sa women’s lawn tennis, men’s soft tennis, juniors chess at juniors basketball.

Sa pagsasara ng Season 99 ay target ng Altas Perpsquad ang korona ng cheerleading event na nakatakda sa Hunyo 19 sa FilOil Eco Oil Centre sa San Juan City.

Ang Arellano Chiefs Squad ang nagdomina sa event sa apat na sunod na season.