Pilipinas labing maayo sa mga nasud sa Southeast Asia | Banat

CEBU, Philippines — Ang Pilipinas mikulit sa labing nindot nga performance sa tanang mga nasud nga naglangkob sa Southeast Asia sa bag-ohay pang natapos nga Paris Olympics 2024 didto sa France.

Human sa duha ka semanang aksiyon, ang mga pambato sa nasud nakadaog og duha ka gold medals kortesiya ni gymnast Carlos Edriel Yulo ug duha ka bronze gikan sa mga boksidor nga sila si Aira Villegas ug Nesthy Petecio.

Tungod niini, ang Pilipinas ug ang Hong Kong nagtabla sa ika-37 nga puwesto taliwala sa 184 ka mga partisipanteng nasud.

Mao kini ang labing mabungahon nga kampanya sa mga Pinoy sukad sila unang misalmot sa Olympics 100 ka tuig ang milabay didto gihapon sa Paris.

Sa kinatibuk-an, ikapito ang Pilipinas sa mga nasud sa Asya nga mipakita og maayong labok sa prestihiyosong torneyo nga mahitabo kausa lamang sud sa upat ka tuig,

Nag-una sa listahan ang China nga gisundan sa Japan, South Korea, Uzbekistan, Iran, ug Chinese Taipei.

“We’re the best performer in Southeast Asian and No. 7 in Asia,” matud pa ni Philippine Olympic Committee president Abraham “Bambol” Tolentino.“We wanted more but with two gold and two bronze medals, should we ask for more from Paris?”