3rd mayor John-John Garcia cup mi-arangkada na didto sa barili | Banat

CEBU, Philippines — Ang ikatulong edisyon sa tinuig nga  Mayor John-John Garcia Cup Sports Festival malampuson nga misikad niadtong Biyernes, Hunyo 14, didto sa RVA Memorial Sports Complex sa lungsod sa Barili, habagatang bahin sa Sugbo.

Gatusan ka mga atletang Barilihanon nga gikatag sa 42 ka teams ang mopakita'g aksiyon nilang usa ka bulan nga torneyo nga naglangkob og 11 ka mga events.

Kini mao ang basketball, volleyball, taekwondo, badminton, futsal, chess, off-road enduro and motocross, lawn tennis, pickle ball, ug "bangkarera", usa ka talagsaong lumba sa mga baroto.

"This is a celebration of unity, sportsmanship, and the skills of our local athletes," matud pa ni  Barili Mayor John-John Garcia sa usa ka pamahayag.

"This tournament aims empowerment of the youth through sports, encourage friendship, build camaraderie, boost health and fitness, and expose the athletes in the grassroots level in our municipality," dugang pa ni Garcia.

Ang maong kalihukan gituyo aron pagdugang og lamas sa kasaulogan sa pista sa Barili agi'g pagtamod sa minahal nilang patrona nga si Santa Ana karong Hulyo 24.

Sa laing bahin, si Mary Ann Alvarado sa Maghanoy maoy gikoronahang  Best Muse.

Sila si Jennifer de la Cerna sa Pang-Pang ug Arabelle Siton sa Tal-ot ang mi-okupar sa ikaduha ug ikatulong puwesto.

Mipahiluna sa ikaupat ug ikalimang dapit sila si Vanessa Secuya sa Tubod ug Venice Bhergel Borbon sa Matalongon.

Samtang ang Team Japitan mibira sa Best in Uniform award. Ang Malolos ug Tal-ot ang nakakuha sa ikaduha ug ikatulong dungog.