Archers at Maroons agawan sa UAAP title | Pilipino Star Ngayon
MANILA, Philippines — Tatapatan ng Universiy of the Philippines ang enerhiyang ipinakita ng De La Salle University para masungkit ang inaasam na kampeonato sa ‘do-or-die’ Game Three ng UAAP Season 86 men’s basketball finals sa Smart Araneta Coliseum.
Nakatakda ang bakbakan ngayong alas-6 ng gabi.
“I felt they had more energy and iyong mga ganitong klaseng game would really teach us what kind of effort to put forth to be able to get yung championship,” sabi ni UP coach Goldwin Monteverde.
Inaasahang huhugot ng puwersa ang Fighting Maroons kina Malick Diouf, CJ Cansino at Harold Alarcon para maibalik sa kanilang eskuwelahan ang korona na naagaw ng Ateneo Blue Eagles noong Season 85.
Nagwagi sa Game One ang UP pero nasagad ang kanilang serye nang dominahin sila ng Green Archers sa Game Two.
Nagliyab ang opensa ng La Salle sa Game Two lalo na sa third quarter kung saan ay lumamang sila ng 16 points, 65-49, papasok ng fourth period.
Kakapitang muli ng Green Archers si Francis Escandor na nanguna sa Game Two matapos ilista ang 14 points mula sa 4-of-5 shooting.
Tiyak na makakatuwang ni Escandor sina Evan Nelle at Season 86 Most Valuable Player (MVP) Kevin Quiambao.