Bolts mikuryente og balik sa Beermen | Banat

CEBU, Philippines — Ang Meralco Bolts mikontrola og balik sa serye human gipahagba ang San Miguel Beermen, 93-89, sa kulbahinam nga Game 3 sa best-of-seven PBA Philippine Cup Finals niadtong Dominggo didto sa Smart Araneta Coliseum.

Si Chis Newsome mipabuto og 26 puntos uban ang upat ka rebounds, upat ka assists, duha ka blocks, ug usa ka steal alang sa Bolts nga magkupot og 2-1 nga bentaha padung sa Game 4 karong Miyerkules didto gihapon sa Big Dome.. Hait kaayo si Newsome nga miposa sa krusyal niyang 3-pointer nga nakapalabaw a Bolts, 91-89, sa hingpit sa hilimatyong segundos.

Human si CJ Perez nasipyat sa iyang itsa nga nakatabla unta sa iskor, si Newsome kalmado kaayong mipasud sa iyang free throws aron tuldokan ang makutas nga daog sa Bolts.

Nakakuha hinoon si Newsome og dakong suporta gikan sa iyang mga kauban.

Si Raymond Almazan mibirada og 17 puntos ug 13 ka rebounds, si Bong Quinto mitali og 16, si Cliff Hodge mipupo og 10 puntos ug 13 ka rebounds, samtang si Chris Banchero miamot og 10 puntos, unom ka rebounds, ug unom ka assists alang sa Bolts. (BANAT NEWS)