Bonus sa mga kawani sa gobyerno sayo nga madawat | Banat

CEBU, Philippines — Sayo nga madawat sa mga kawani sa gobyerno ang ilang year-end bonus ug cash gift dungan sa ilang unang payroll sa buwan sa Nobiyembre, sumala sa bag-ong circular nga gipirmahan sa Department of Budget and Management (DBM).

Matud ni Secretary Amenah “Mina” F. Pangandaman, kining DBM Budget Circular No. 2024-3 naghatag og updated nga mga guidelines aron masiguro ug mapadali ang pag-release sa mga benefits.

Pinaagi niini, ang mga empleyado makadawat sa ilang year-end bonus nga katumbas sa usa ka buwan nga sweldo, ug cash gift nga P5,000 uban sa ilang unang payroll sa sunod buwan, Nobiyembre, imbes nga inighuman sa Nobiyembre 15.

Gipasabot ni Pangandaman nga ang sayo nga eskedyul sa pagpagawas usa ka pamaagi sa pag-ila sa dedikasyon sa mga empleyado, pagpauswag sa ilang kasinatian sa holiday ug kadasig sa pagserbisyo sa publiko. "Our new release schedule for the cash gift and year-end bonus is a simple and important way to recognize the hard work of our government employees. Gusto natin siguraduhin na matatanggap nila ang bonus nila on time, para masaya ang Pasko at mas pagbutihin pa nila ang kanilang serbisyo," saysay niya.

Ang circular ma-apply usab sa tanang ahensya sa nasudnong gobyerno, mga opisina sa konstitusyon, state universities and colleges (SUCs), government-owned or -controlled corporations (GOCCs), ug local government units (LGUs).

Subay niini, ang mga ahensya gi-require nga mohimo sa gikinahanglang mga kausaban sa ilang mga sistema sa payroll aron malikayan ang dugang nga pagkalangan.  MEL BANAT NEWS