Delgaco may pag-asa pa | Pilipino Star Ngayon
PARIS — Minalas si Pinay rower Joanie Delgaco na makakuha ng outright entry sa quarterfinals ng women’s single sculls matapos pumang-apat sa Heat 2 kahapon sa Vaires-sur-Marne Nautical Stadium dito.
Nagsumite si Delgaco ng tiyempong 7:56.26 sa ilalim nina top three rowers Karolien Florijn (7:36.90) ng Netherlands, Aurelia-Maxima Katharina Janzen (7:41.15) ng Switzerland at Nina Kostanjsek (7:46.30) ng Slovenia.
Kasama pa si Delgaco sa top three rowers bago kumulapso sa gitna ng 2,000m race na sinamantala ni Kostanjsek para agawin ang third place at ang outright entry sa quarterfinals.
Sa pagsabak ni Delgaco sa repechage ngayong hapon ay may tsansa pa siyang makapasok sa quarterfinals.
“Depende sa draw, puwedeng mag-top two siya sa repechage at makapasok pa rin sa quarterfinals,” sabi ni Philippine Rowing Association president Patrick Gregorio sa two-time Southeast Asian Games gold medal winner.
Sa Heat 2 ay inungusan ni Delgaco sina Nihed Benchandli (8:06.62) ng Algeria at Majdouline El Allaoui (8:30.47) ng Morocco.
Nakatakda namang sumalang si gymnast Carlos Yulo sa men’s qualification ng Subdivision 2 kagabi.
Makikita naman sa aksyon ngayon sina Pinay gymnasts Aleah Finnegan, Emma Malabuyo at Levi Ruivivar sa artistic gymnastics women’s qualification at si fencer Samantha Catantan sa women’s individual foil.
Lalabanan ni Pinay boxer Aira Villegas si Moroccan Yasmine Mouttaki sa Round of 32 ng women’s 57 kilogram division.
Samantala, buong pagmamalaki namang iwinagayway ng Team Philippines ang watawat ng bansa sa isinagawang opening ceremony sa Seine River sakay ng bangka.
Nakasuot ng barong na disenyo ni Francis Libiran, nagbangka ang Philippine delegation sa pangunguna nina flag bearers Nesthy Petecio at Carlo Paalam bilang 148th sa parade of nations.
