Gabines bayani sa Cheetahs | Banat
CEBU, Philippines — Si Serge Gabines milansang og krusyal nga 3-pointer sa pinal nga singko segundos sa duwa aron aswaton ang Benedicto College Cheetahs ngadto sa makutas ug kulbahinam nga daog batok sa Cebu Roosevelt Memorial Colleges (CRMC) Mustangs, 69-67, sa Cebu Schools Athletic Foundation, Inc. (CESAFI) Season 23 Men's Basketball Tournament niadtong Martes sa gabii didto sa Cebu Coliseum.
Ang Cheetahs mikolapso human mi-abante og 13 puntos, 38-51, sa sayong bahin sa second half apan nagsandig sa pagkamabayanihon ni Gabines aron langkaton ang ikaduha nilang daog sud sa upat ka duwa.
Sa dihang naalkansi sila og usa ka lugas, 66-67, si Gabines way kurat nga miposa og tres nga nakapalumpayat sa tibuok nila bench nga gipangulohan ni coach BJ Murillo sa tumang kalipay sa nahibilin nga singko segundos sa duwa.
Ang Mustangs duna pa untay tsansa nga ilogon ang daog apan nasipyat ang gitira nga tres sa team captain nilang si Paulo Dalumpines.
Si Gabines mi-iskor lamang og nuybe puntos apan tataw nga nasentro kaniya ang atensiyon sa ilang kalamposan.
Si Den Rick Orgong maoy nangu sa Cheetahs uban ang 16 puntos samtang sila si Junnil Bulan ug Kenneth Babalcon nagkumboya'g 21 puntos timaan sa balanse nilang ataki.
Sila si Redjhee Recimiento ug James Gelig nagkumbinar og 29 puntos samtang si Dalumpines mitali og 10 puntos alang sa Mustangs, nga nasugamak sa ikaupat nga sunod-sunod nga higayon human midaog sa ilang debut batok sa Felipe R. Verallo Foundation College (FRVFC) Blue Dragons niadtong Septiembre 23.
Sa juniors division, ang University of San Jose-Recoletos (USJ-R) Baby Jaguars miinat sa perpekto nilang sinugdanan ngadto sa 3-0 human giihaw ang University of Southern Philippines Foundation (USPF) Baby Panthers, 79-60.
Sila si Ryan Justin Artis ug JLord Pepito mipupo og managsamang 13 puntos samtang sila si JV Oringo ug Chan Benedict Brigoli mikimada og 12 puntos matag usa alang sa way pildeng Baby Jaguars nga nagpabilin sa ikaduhang dapit sa standings sunod sa 5-0 nga University of Cebu Lapu-Lapu and Mandaue (UCLM) Baby Webmasters. (BANAT NEWS)
