UC Webmasters 7-0 ang tirada | Banat
CEBU, Philippines — Human sa lima ka adlaw nga pahuway, mobalik na ang aksiyon sa Cebu Schools Athletic Foundation, Inc. (CESAFI) Season 23 Men's Basketball Tournament karong adlawa didto sa Cebu Coliseum diin ang University of Cebu (UC) Webmasters naglaraw nga ipadayon ang mainit nilang ratsada.
Ang Webmasters nag-inusara karon sa liderato sa college division bitbit ang perpektong 6-0 rekord.
Kon ugaling molampus batok sa 3-2 nga University of San Carlos (USC) Warriors sa ilang sangka nga gikatakda sa alas 3:30 sa hapon, hayan nga inaton sa UC ang labing nindot nilang sinugdanan sa 23 ka tuig nga kasaysayan sa liga ngadto sa pito ka duwa, butang nga wala pa mahimo sa Webmasters sukad masukad.
Sa laing collegiate match-up, ang Benedicto College Cheetahs ug ang Felipe R. Verallo Foundation College (FRVFC) Blue Eagles mag-engkwentro sa alas-5 sa hapon.
Ang Cheetahs, nga sa kasamtangan nagtangag og 3-3 nga baraha, buot kumpletohon ang gitinguha nilang 3-0 sweep batok sa pareho nilang mga bag-ohanon nga koponan sa liga.
Ila nang gipayaka ang Cebu Roosevelt Memorial Colleges (CRMC) Mustangs ug ang University of the Philippines (UP) Cebu Fighting Maroons ug sunod nilang giplanohan nga tumbahon mao ang 1-6 nga Blue Dragons.
Sa high school category, ang 2-4 nga City of Bogo Science and Arts Academy (CBSAA) Trailblazers naglaraw sa ikatulo nilang sunod-sunod nga daog sa dihang ilang harongon ang University of Southern Philippines Foundation (USPF) Baby Panthers sa alas-2 sa hapon, samtang ang 1-6 nga USC Baby Warriors ug ang 1-5 nga Cebu Institute of Technology-University (CIT-U) Baby Wildcats magbangga sa pasiunang duwa nga gikatakda sa alas 12:30 sa hapon.
