Gilas gipilde sa Georgia apan sud gihapon sa Semis makigsangka sa Brazil karong gabii alang sa luna sa final | Banat
CEBU, Philippines — Ang Gilas Pilipinas nahagba sa mga kamot sa Georgia pinaagi sa sikit nga desisyon, 96-94, apan nakamaneho pag-angkon og puwesto sa semifinals sa Olympic Qualifying Tournament niadtong Biyernes sa gabii didto sa Riga Arena sa Latvia.
Taliwala sa ilang kaparotan, ang mga Pinoy mitapos gihapon nga No.2 sa Group A sunod sa top seed Latvia.
Sa semis nga gikatakda sa alas 8:30 sa gabii karong adlawa (Sabado, Hulyo 6), ang Gilas makigharong sa Brazil alang sa luna sa final. Ang top finisher lamang sa torneyo maoy mo-abante sa Paris Olympics nga mosikad na karong Hulyo 26 didto sa France.
Padung sa duwa, ang World No.23 Georgia nanginahanglan nga pildihan ang Gilas og 19 puntos aron sila makatikang sa sunod nga hugna.
Daw andam kaayo ang Georgia pagbuhat sa maong tahas gumikan kay ilang giablihan ang duwa pinaagi sa nagkayong 16-0 rally ug sa usa ka higayon naglabaw pa og 20 puntos, 40-20, sa tunga-tungang bahin sa ikaduhang kuwarter.
Apan ang Gilas ubos sa pagtimon ni coach Tim Cone milusad og usa madasigong resbak nga gipangulohan nilang Justin Brownlee, Dwight Ramos, CJ Perez ug Chris Newsome hinungdan nga nakatabla sila sa iskor nga 74-74 human sa tulo ka kuwarter.
Sikit na nga kumbati ang nahitabo sunod diin ang Gilas nakalabaw pa gani og usa ka lugas apan ang Georgia mipakita og igong katakos hangtud sa hilimatyong segundos aron buk-on ang dughan sa mga Pinoy nilang karibal.
