Talisay City LGU nipahigayon og seminar sa sports ug character development | Banat

CEBU, Philippines — Ang kagamhanan sa dakbayan sa Talisay nipahigayon og seminar nga giulohan og "The Impact of Sports in Advocating Nationalism and Character Development Among the Youth" kagahapong adlawa,Huwebes, Oktubre 17 didto sa Solea Mactan Resort, Lungsod sa Cordova. 

Gipaluyohan ni Talisay City Mayor Gerald Anthony "Samsam" Gullas, Jr. ug Vice Mayor Richard Francis "Choy" Aznar ang mahinungdanong kalihokan nga gipasiugdahan ni Konsehal Rodolfo “Rodi” Cabigas, tsirman sa games, amusements and professional sports sa konseho sa Dakbayan sa Talisay inabagan sa Sangguniang Kabataan (SK) Federation nga gipangulohan sa presidente niini nga si John Van Exel Restauro.

Gitambongan sa mga  SK chairpersons ug representante gikan sa Katipunan ng Kabataan (KK) ug Local Youth Development Office (LYDO) ang seminar diin gituyo kini aron pagdasig sa mga kabata-onan nga hangpon ang responsibilidad isip mga lider sa ilang komunidad ingon man paghatag kanila sa gikinahanglan nilang mga hinagiban aron sila mamahimong epektibo nga mga instrumento sa serbisyo publiko.

Isip mga modelo nga gitamod ug gitan-aw sa katawhan uban ang tumang respeto, ang nagmabulokon nga aktibadad nagdalit sa mga partisipante og lawom nga pagsabot kabahin sa importansiya sa paghatag og balik ug paghimo og positibong impluwensiya sa uban bisan sa pinakagamay nga mga butang.   

Si Emmanuel "Manny" Villaruel, sports editor sa The Freeman ug Banat News ug kasamtangang vice president sa Sportswriters Association of Cebu (SAC) maoy guest speaker sa nahisgutang kalihokan.

"Aside from promoting healthy living and physical fitness, sports teaches us a lot of lessons in life.  It builds character, enabling us to nurture the values of hard work, discipline, courage, and perseverance among others that drive us to be the best version of ourselves", matud ni Villaruel.

"One of the transformative power of sports is shaping the lives of young people and molding them to become worthy members of the society. It empowers the youth to become good and valuable citizens, which is a strong foundation in nation-building", panapos ni Villaruel. BANAT NEWS