NU pinigil ng La Salle | Pilipino Star Ngayon
MANILA, Philippines — Pina-amo ng De La Salle University ang National University matapos igapos ang 88-78 panalo sa UAAP Season 86 men’s basketball tournament na nilaro sa SM Mall of Asia Arena kahapon.
Pinana ng Green Archers ang pangatlong sunod na panalo para ilista ang 6-3 karta at tumibay ang kapit sa No. 3 spot sa team standings.
Tumipa si Kevin Quiambao ng triple-double na 20 points, 14 rebounds at 10 assists para sa La Salle na pinigil ang limang dikit na pananalasa ng NU.
Ipinaramdam ng La Salle ang kanilang lakas sa unang dalawang quarters, nang iwanan nila ang Bulldogs ng 11-point lead, 50-39 sa halftime.
Nanatili ang mainit na laro ng Taft-based squad sa second half patungo sa kanilang panalo.
Sa unang laro, tinuldukan ng University of the East Red Warriors ang five-game losing streak matapos nilang tambakan ang University of Sto. Tomas 86-73.
Tangan ng Red Warriors ang 3-6 karta, nasa pang pito sila ng team standings pero buhay pa rin ang kanilang tsansa sa playoffs.
Tumikada sina Precious Momowei, at Abdul Sawat ng tig-17 puntos upang akbayan ang Recto-based squad sa panalo at ibaon lalo sa ilalim ang Growling Tigers na nagtala ng 1-8 baraha.
Naghabol ang Growling Tigers ng 17 points sa third quarter at naibaba nila ito sa 10, ngunit nag-init ang opensa nina Migs Pangilinan at Nic Cabañero para muling agawin ang trangko sa 59-69 may 7:44 minuto pa sa fourth quarter.
