Quiboloy binigyan ng ‘last chance’ ng Senado | Pilipino Star Ngayon

MANILA, Philippines — Bibigyan ng Senado ng isa pang pagkakataon si Kingdom of Jesus Christ founder Pastor Apollo Quiboloy na humarap sa pagdinig ng Senate committee on women and gender equality bago siya arestuhin kung hindi sisipot sa pagdinig, ayon kay Senate Pre­sident Juan Miguel Zubiri.

Kabilang sa pinapasagot kay Quiboloy ang mga alegasyon ng human trafficking.

Sinabi ni Zubiri na kakausapin muna nila si Sen. Risa Hontiveros na dapat gamitin muna ang lahat ng legal na paraan kaugnay sa isyu ng indirect contempt bago ipaaresto si Quiboloy.

“Kausapin ko muna si Senator Risa kasi, naglabas na ng ruling ang Supreme Court sa Pharmally issue regarding the indirect contempt. So, under the ruling of the Supreme Court, we must exhaust all legal avenues. In other words, due process,” ani Zubiri.

Idinagdag ni Zubiri na kailangan lamang muna ni Hontives na magkaroon muli ng isa pang pagdinig para magbigay ng “show cause order.”

“Kaya, ang kahilingan ko kay Senator Risa, ang kailangan lang niyang gawin ay magkaroon ng panibagong pagdinig ng komite. Baka ngayon o bukas o Lunes, para magbigay ng show cause order.,” ani Zubiri.

Isiniwalat din ni Zubiri na nakatanggap siya ng kopya ng liham ni Sen. Robin Padilla kay Hontiveros. Tinututulan ni Padilla ang pagpapa-aresto kay Quiboloy.

“So, kapag nag-issue si Ma’am Risa ng show cause order, and the answer turns out to be non-satisfactory…then it is ministerial on the part of the Senate to release the issue for the (arrest warrant),” pahayag ni Zubiri.