RoS, Converge at Phoenix sa Kadyawan Invitationals | Pang-Masa
MANILA, Philippines — Ipaparada ng Rain or Shine, Converge at Phoenix ang kanilang mga imports sa pagsabak sa 39th Kadyawan Invitational Basketball Tournament na nagsimula kahapon sa USEP Gym sa Davao City.
Ilalaban ng Elasto Painters si balik-import Aaron Fuller, habang susubukan ng FiberXers si Scotty Hopson at ipaparada ng Fuel Masters si Jayveous McKinnis.
Si Fuller ay naging import ng NLEX na dating hinawakan ni Rain or Shine coach Yeng Guiao bago naglaro para sa TNT Tropang Giga.
Ito naman ang unang pagsabak nina Hopson at McKinnis sa PBA na bubuksan ang Season 49 sa pamamagitan ng Governors’ Cup sa Agosto 18.
Ang iba pang imports na matutunghayan sa komperensya ay sina Justin Brownlee ng Barangay Ginebra, Allen Durham ng Meralco, Glenn Robinson III ng Magnolia, Tauras Jogela ng San Miguel, Darius Days ng TNT Tropang Giga, Taylor Johns ng NorthPort, Brandon Edwards ng Terrafirma, Ricky Ledo ng Blackwater at Myke Henry ng NLEX.
Ang height limit para sa mga imports ay 6-foot-6.
Sa Kadyawan Invitationals ay magtutuos ang Elasto Painters at Fuel Masters ngayong alas-5 ng hapon kasunod ang salpukan ng FiberXers at La Salle Green Archers sa alas-7 ng gabi.
Bukas ay haharapin naman ng Phoenix ang La Salle sa alas-5 ng hapon bago ang banggaan ng Rain or Shine at Converge sa alas-7 ng gabi.
Nakatakda ang championship at battle-for-third sa Linggo.