UV Baby Lancers kampiyon sa 5th San Remigio Properties Invitational Cup | Banat

CEBU, Philippines — Ang University of the Visayas (UV) Baby Lancers nagsandig sa eksplosibo nilang opensiba sa ikaduhang kuwarter aron pakagingon ang National Yilan Senior High School sa Taiwan, 83-66, ug langkaton ang kampiyonato sa 5th San Remigio Properties Basketball Tournament Invitational Cup niadtong Dominggo, Agosto 4, didto sa Cebu Coliseum.

Labaw lamang og usa ka lugas, 20-19, human sa nag-unang 10 minutos sa aksiyon, ang Baby Lancers milusad og nagkayong 30-17 rally sa ikaduhang bahin sa duwa aron pag-establisar og dakong 50-36 nga labaw sa halftime.

Namintinar sa Baby Lancers ang ilang bentaha, 58-44, human sa tulo ka kuwarter sa wala pa mikaratil ngadto sa 17 puntos nga paglampaso sa mga bisitang Taiwanese.

Si Jhunrel Dagatan maoy bida sa upat ka UV players nga mikadlit og double figures uban ang 22 puntos, siyam ka rebounds, usa ka assist ug tulo ka steals.

Miamot si Jonathan de la Torre og 14 puntos, duha ka rebounds, ug duha ka steals, samtang si Rhoderick Cambarijan miposte og double-double nga 11 puntos ug 10 ka rebounds.

Si Cian Abella mihipos sab og 11 puntos uban ang upat ka rebounds ug upat ka steals alang sa Baby Lancers.     

Si Chen Yen-Hsun maoy nangu sa Yilan uban ang 13 puntos, 10 ka rebounds ug pito ka assists, samtang si Yu Chen-Jui mitali og 12 puntos ug tulo ka rebounds sa pilderong        kawsa.

Sa sangka alang sa ikatulong dapit, sila si Jake Yong ug Carlo Salgarino nagkumbinar og 22 puntos, 10 ka rebounds, tulo ka assists, ug pito ka steals aron pangulohan ang University of Cebu (UC) Baby Webmasters ngadto sa 60-51 nga pagpasukarap sa Sacred Heart School-Ateneo de Cebu (SHS-AdC) Magis Eagles.