UP Cebu, USPF manulong sa Leyte | Banat
CEBU, Philippines — Kon tugotan sa panahon, duha ka varsity teams gikan sa Cebu Schools Athletic Foundation, Inc. (CESAFI) ang mowadwad sa ilang abilidad sa 2024 Padre Burgos Mayor's Cup Open Inter-Collegiate Basketball Tournament nga gikatakda karong Hulyo 20-23 didto sa Padre Burgos, Southern Leyte.
Kini mao ang University of the Philippines (UP) Cebu Fighting Maroons ug ang University of Southern Philippines Foundation (USPF) Panthers, nga parehong nangandam alang sa umaabot nga CESAFI Season 24 nga gikatakda mosikad sa Septiembre 21.
Ang Fighting Maroons ug ang Panthers makigharong sa two-time defending champion OCCCI Ormoc Sheermasters, reigning National Capital Region Athletic Association (NCRAA) champion Immaculada Concepcion College (ICC) Bluehawks, Asian Institute of Maritime Studies (AIMS) Blue Sharks,ug Lakawan Squad Tacloban sa upat ka adlaw nga torneyo nga nagdalit og dul-an sa P250,000 nga ganti sa mga mananaog.
Bahinon sila sa duha ka grupo nga moduwa ubos sa single round robin format. Ang top 2 mo-abante sa crossover semifinals. Ang mga mananaog maoy mag-ilog sa korona sa tinagakay nga duwa.
Ang makampiyon mobulsa og P100,000, samtang ang mopahiluna sa ikaduha ngadto sa ikaupat nga dapit makadawat og P70,000, P50,000, ug P20,000.