Bucks sinapawan ang Nuggets | Pilipino Star Ngayon
MILWAUKEE — Tumipa si Giannis Antetokounmpo ng 36 points, 18 rebounds at 5 assists para pamunuan ang Bucks sa 112-95 pagpapatumba sa nagdedepensang Denver Nuggets.
Nag-ambag si Damian Lillard ng 18 points para sa ikalawang dikit na panalo ng Milwaukee (35-19) habang may 13 markers si Bobby Portis bago napatalsik sa huling 4:54 minuto ng laro.
Kumolekta si Nikola Jokic ng 29 points, 12 rebounds at 8 assists sa panig ng Denver (36-18) at may 14 at 11 markers sina Aaron Gordon at Michael Porter Jr., ayon sa pagkakasunod.
Nagtala ang Bucks ng 22-point lead sa second period para sa 60-44 halftime lead na hindi na napababa ng Nuggets.
Sa Dallas, inirehistro ni Luka Doncic ang kanyang ika-10 triple-double sa season sa 112-104 paggupo ng Mavericks (31-23) sa Washington Wizards (9-44).
Sa Salt Lake City, nagpaputok si Klay Thompson ng 26 points at may 25 markers si Stephen Curry kasama ang limang triples sa fourth quarter sa 129-107 pagrapido ng Golden State Warriors (26-25) sa Utah Jazz (26-28).
Sa Los Angeles, nagsalpak si Karl-Anthony Towns ng 24 points kasunod ang 23 markers ni Anthony Edwards sa 121-100 pagkagat ng Minnesota Timberwolves (37-16) sa Clippers (35-17).
