Capitals sinungkit ang Game 1 | Pilipino Star Ngayon

PALAYAN, Nueva Ecija – Itinakas ng Nueva Ecija ang dramatikong 94-91 panalo kontra Quezon sa Game 1 ng kanilang PSL President’s Cup best-of-five championship series dito sa Nueva Ecija Coliseum.

Bumida para sa 1-0 lead sa serye ng Capitals si Chris Bitoon na nagtala ng 16 points at 12 assists.

Nagsalpak si Bitoon ng apat na 3-point shots sa fourth quarter para pigilan ang paulit-ulit na paghahabol ng Titans.

Nabawasan ang Nueva Ecija ng ilang players matapos umalis sina Michael Mabulac, Hesed Gabo at Roi Sumang para lumipat sa MPBL.

Nadagdag naman sa injury list sina JP Maguliano at Bobby Balucanag.

 Hindi na nagawang makapagpatuloy pa ni Balucanag ang paglalaro at kinailangan siyang bitbitin ng stretcher palabas ng venue.

“It shows our championship character,” sabi ni coach Don Dulay. “It was a character test for us and so far, we passed the test and our guys stepped up.”

 Malaking hamon man ang kinaharap ni Bitoon at ng iba pang miyembro ng Capitals, alam niya ang halaga ng home court advantage.

 “Masarap talagang maglaro sa harap ng hometown crowd, talagang gaganahan ka,” dagdag pa ni Bitoon.

 Lalaruin ang Game 2 ng serye sa Nueva Ecija kung saan hangad ng Capitals na lumapit sa pagsungkit ng korona.