CHED official inireklamo ng mga estudyante | Pilipino Star Ngayon
MANILA, Philippines — Umapela kay Pangulong Ferdinand “Bongbong” Marcos Jr., ang ilang mga estudyante sa Our Lady of Fatima University (OLFU) sa Quezon City na imbestigahan at disiplinahin ang isang mataas na opisyal ng Commission on Higher Education (CHED) sa Luzon dahilan umano sa ilang paglabag sa pamantayan ng moralidad.
Tinukoy ng mga estudyante ang inirereklamong opisyal na si Dr. Aldrin Darilag ng CHED-Luzon at professor rin sa Don Honorio Ventura State University (DHVSU) sa Pampanga.
Sa kanilang reklamo, sinabi ng isang alyas “Guia”, Tourism student ng OLFU na kailangang paboran ng mga mag-aaral ang gusto ni Darilag para sila ay makapasa at maka-graduate.
Isang halimbawa umano ang reklamo ng isang MBA student na kahit na kumpleto sa lahat ng requirements ay nabigyan pa ng professor ng grading na incomplete.
Nais umano ng professor na makipag-date sa kanya ang napupusuang mag-aaral tulad ng pagpunta sa mga gay bars at kung hindi ay bagsak sa kanyang klase. Ang bagay na ito umano ay naireklamo na kay CHED Chairperson Prospero de Vera III na ipinarating naman sa tanggapan ni Executive Secretary Lucas Bersamin.
Hiniling ng mga mag-aaral na imbestigahan ang ginagawa umano nito sa mga mag-aaral na kaniyang kinukursunada.