Davis binuhat ang Lakers vs T-Wolves | Pilipino Star Ngayon

LOS ANGELES — Kumolekta si Anthony Davis ng 27 points, season-high 25 rebounds at career-high 7 steals sa 120-109 demolisyon ng Lakers sa Minnesota Timberwolves.

Nagtala rin si Davis ng 5 assists at 3 blocked shots para sa Lakers (36-30) habang may 29 points, 9 assists at 8 rebounds si LeBron James.

Humataw sina Anthony Edward at Naz Reid ng tig-25 points sa panig ng Timberwolves (44-21) na naglaro na wala sina Rudy Gobert at Karl-Anthony Towns.

Mula sa 69-68 halftime lead ay nagpasabog ang Lakers ng 29 points sa kabuuan ng fourth quarter at nilimitahan ang Timberwolves sa 17 markers patungo sa kanilang panalo.

Sa New York, nagtala si Kelly Oubre Jr. ng 18 points at 10 rebounds sa 79-73 panalo ng Philadelphia 76ers (36-28) kontra sa Knicks (37-27).

Sa Oklahoma City, kumamada si Shai Gilgeous-Alexander ng 23 points sa 124-93 paggupo ng Thunder (45-19) sa Memphis Grizzlies (22-43).

Sa Sacramento, bumitaw si Fred VanVleet ng 22 points habang may 19 markers si Fil-Am Jalen Green sa 112-104 paggiba ng Houston Rockets (29-35) sa Kings (36-27).

Sa Los Angeles, tumipa si Damian Lillard ng 35 points at 11 assists at kumolekta si Giannis Antetokounmpo ng 34 points, 10 assists at 7 rebounds sa 124-117 pagsuwag ng Milwaukee Bucks (42-23) sa Clippers (41-22).

Sa Orlando, umiskor sina Tyrese Haliburton at Pascal Siakam ng tig-20 points sa 111-97 pagdaig ng Indiana Pacers (36-29) sa Magic (37-28).  

Sa Miami, nagtala si Kyle Kuzma ng 32 points sa 110-108 pagtakas ng Washington Wizards (11-53) sa Heat (35-29).