Lady Spikers paghahandaan ang Lady Bulldogs | Pilipino Star Ngayon
MANILA, Philippines — Nakatakda ang finals rematch ng defending champion De La Salle University at National University sa Sabado sa UAAP Season 86 women’s volleyball tournament sa Smart Araneta Coliseum.
Kaya naman ngayon pa lang, pinaghahandaan na ng Lady Spikers ang magiging game plan nito kontra sa Lady Bulldogs.
Parehong nawalan ng key players ang dalawang tropa.
Wala na sa La Salle sina wing spiker Jolina Dela Cruz, setter Mars Alba, middle blocker Fifi Sharma at libero Justine Jazareno na pare-parehong naglalaro na sa pro league.
Ngunit nananatiling solido ang lineup ng Lady Spikers lalo pa’t nariyan pa rin sina reigning Rookie-MVP Angel Canino, Best Middle blocker Thea Gagate, opposite hitter Shevana Laput at outside hitter Aleia Malaluan.
“What I always keep in mind is what coach Ramil de Jesus told us that we shouldn’t look for those who are no longer around,” ani Canino.
Para kay Canino, kailangang sumentro na ang atensiyon ng kanilang tropa sa kasalukuyang lineup nito.
“We have to work with what we have. We’re still complete and we’re not lacking anything. We just need to work,” dagdag ni Canino.
Sa kabilang banda, nawala sa NU sina dating team captain Ces Robles at top libero Jen Nierva.
Naiwan ang pasanin kina veteran players Bella Belen, Alyssa Solomon, Camilla Lamina, Vangie Alinsug at Erin Pangilinan.
Parehong may 5-1 rekord ang La Salle at NU na nasa ilalim ng nangungunang University of Santo Tomas na may malinis na 5-0 baraha.
