Giyera sa NBA playoff spots | Pilipino Star Ngayon

NEW YORK — Ilang laro na lamang at didribol na ang 2024 NBA playoffs at unti-unti nang mapupuno ang mga postseason spots bago matapos ang regular season sa Abril 14.

Ang top six teams mula sa Eastern at Western Conference ay makakatiyak ng playoff spots habang ang No. 7, 8, 9 at 10 squads ang maglalaro sa play-in tournament sa Abril 16-19.

Sa Eastern Conference ay nakakuha na ng playoff berth ang No.1 Boston Celtics (62-16) at No. 2 Milwaukee Bucks (47-31).

Ang huling apat na playoff berths ay pinag-aagawan ng Orlando Magic (46-32), New York Knicks (46-32), Cleveland Cavaliers (46-33), Indiana Pacers (45-34), Philadelphia 76ers (44-35) at Miami Heat (43-35).

May tiket na sa play-in tourney ang Chicago Bulls (37-41) at Atlanta Hawks (36-42).

Sa Western Conference, mayroon nang playoff spot ang Minnesota Timberwolves (54-24), Denver Nuggets (54-24) at Oklahoma City Thunder (53-25).

Naglalaban para sa hu­ling tatlong playoff seats ang LA Clippers (50-28), Dallas Mavericks (48-30), Phoenix Suns (46-32), New Orleans Pelicans (46-32), Sacramento Kings (45-33), LA Lakers (45-34) at Golden State Warriors (43-35).