HRRACI Sportsfest 2024: Seda Central Bloc miharos og tulo ka kampiyonato | Banat
CEBU, Philippines — Ang Seda Central Bloc mipakyaw og tulo ka bulawanong korona sa basketball ug volleyball events sa malampuson nga Hotel Resort and Restaurant Association of Cebu, Inc. (HRRACI) Sportsfest 2024, nga natapos niadtong Domingo, Hulyo 21, didto sa didto sa University of Southern Philippines Foundation (USPF) gym sa may Salinas Drive sa Barangay Lahug, dakbayan sa Sugbo. Ang kanhi pro nga si Steve Castro mipabuto og 39 puntos sa dihang ang Seda Central Bloc mipatikangkang sa Shangri-la Mactan Resort, 89-80, aron paglugwa nga kampiyon sa basketball.
Si Castro, nga miposa og pito ka 3-pointers ug kausa lamang masipyat sa 13 niya ka free throws, duna say lima ka rebounds, upat ka assists, ug upat ka steals alang sa Seda hinungdan sa pagbayaw kaniya Finals MVP.
Dako sab og naambag si Harold Cortes nga mikadlit og 15 puntos, unom ka rebounds, tulo ka assists ug upat ka steals ingon man si Renzo Galdo nga mihipos og 14 puntos, upat ka rebounds, ug duha ka assists alang sa Seda, nga nabiyaan og otso puntos, 22-30, sa sayong bahin sa ikaduhang kuwarter. Alkansi gihapon og tres puntos sa halftime, 38-41, ang Seda milusad og nagkayong resbak sa ikatulong kuwarter aron ilogon ang labaw, 63-57, sa hingpit.
Samtang nahutdan og bala ang ilang mga karibal, ang Seda ni coach BJ Murillo padayong nanginit dayon na ngadto sa pagrehistro sa kinadak-an nilang labaw nga 19 puntos, 84-65, sa naghinapos nga bahin sa duwa. Ang Shangri-la mitak-op sa duwa pinaagi sa 15-5 rally hinungdan nga wala kaayo sila malubong.
Si Nico Magat maoy nangu sa Shangri-la bitbit ang 20 puntos, lima ka rebounds, ug unom ka assists. Si Kenneth Glenn Niones mikolekta og 16 puntos ug upat ka rebounds, samtang si Jose Miguel Tabaloc adunay 13 puntos, siyam ka rebounds ug duha ka steals apan nakawang ang ilang paningkamot.
Sa volleyball, giharos og langkat sa madasigon nga Seda spikers ang duha ka titulo.
Giserohan sa Seda ang Nustar Resort and Casino, 3-0, sa parehong iskor nga 25-20 aron sakmiton ang women's title ug dayon gilampaso ang Dusit Thani Mactan Cebu sud gihapon sa sa tulo ka sagunson nga sets, 25-20, 25-17, ug 25-16 aron birahon ang korona sa men's division.