Makaapas pa kaha sa Palarong Pambansa? | Banat

Kong tan-awan ang development sa trabaho karon sa rehabilitation sa Cebu City Sports Center layo pa man kaayo sa tinood nga makaapas sa gikatakdang pagpahigayon sa Palarong Pambansa nga himoon sa dakbayan sa Sugbo sa Hulyo 6 hangtud sa Hulyo 17.

Hinuon aduna pay kapin sa usa ka buwan nga higayon aron mahuman kini kong dili maglangay langay ang gatrabaho, sa kadugay sa panahon nilang tinarbaho niadto pang nakalabayng tuig nganong wala pa man intawon masugdi pagtrabaho ang rubberised track oval?

Ang pag-rehabilitate ra ba sa Cebu City Sports Center ang usa sa gihimong rason nganong wala mapahigayon ang Sinulog Grand showdown kay lagi on going ang repair sa sulod, unya unsa naman ni karon nga wala pa man gyud diay mahuman.

Basin mahisama ni sa SRP venue sa Sinulog nga kanunay nag apas sa panahon o eleventh hour ang ilang paghuman sa venue aron lang maapas sa big day.

Karon dili layo nga ingon niini na usab ang mahitabo sa rubberised track oval nga mahuman kunohay sa dili pa ang gikatakdang panahon apan pinadagan na unya ang trabaho maayo lang tan-awon apan inig gamiton na manglubong na unya ang tiil sa mga atleta kay dinali dali ang paghuman sa track oval.

Hinuon mipasalig matud pa ang kontraktor nga mahuman kini sa dili pa motapos ang buwan sa Hunyo.

Kana kong dili magsige og ulan kay kong magsugod na gani ang ting uwan aw ambot nalang, mahuman seguro apan hilaw ang trabaho nga dakong usik sa kwarta sa katawhan nga gigamit niini.

Kanus-a man mabag-o ang ingon niini nga systema nga kong sa layo pa maglangay langay sa trabaho ug ayha na paspasan kong hapit na ang event murag nakiglumba sa panahon nga bisan unsaon dili ra ba gyud makaapas kong ang panahon mao nay hagiton.

Dako kining hagit karon sa liderato ni Acting Mayor Garcia ang paghan-ay sa dakong kalihokan nga himoon sa dakbayan sa Sugbo, kong mahimo niya kining hapsayon syempre pagdayeg ang iyang maangkon nga bisan sa kamubo sa panahon sa iyang padumala iya gihapong nahimo ang iyang trabaho.

Huwaton nalang nato kong unsay sangpotanan niining tanan sa labing dako nga kalihokan sa paugnat sa kusog sa nasud nga dinhi sa dakbayan himoon sa sunod buwan.