Maroons sinibak ang Tamaraws | Pang-Masa
MANILA, Philippines — Lumapit sa pagsilo ng ‘twice-to-beat’ incentive ang University of the Philippines matapos gilitan ang Far Eastern University, 81-64, sa UAAP Season 86 men’s basketball tournament kahapon sa Smart Araneta Coliseum.
Tangan ang 10-2 karta, nanatili ang Fighting Maroons sa tuktok ng team standings kung saan ang top two teams pagkatapos ng double-round robin ay mabibiyaan ng insentibo.
Maagang nagparamdam ng lakas ang Diliman-based squad matapos hawakan ang seven-point lead, 34-27, sa halftime mula sa mainit na opensa nina Aldous Torculas at Francis Lopez.
Tumikada si Torculas ng 13 points, habang 12 markers naman ang ambag ni Lopez para sa Fighting Maroons na inalisan ang Tamaraws ng pag-asa na makasampa sa Final Four.
“I feel blessed,” sabi ni Torculas. “I’m just being patient, lalo na iyong team.”
Nakatuwang nina Torculas at Lopez sina Harold Alarcon at Chicco Briones sa opensa kaya napanatili nila ang kalamangan sa second half.
Nagtala rin sina Alarcon at Briones ng 11 at 9 points, ayon sa pagkakasunod, para sa UP.
Tumikada si L-Jay Gonzales ng 20 markers at may 17 points si Jorick Bautista para sa FEU na nalasap ang pang-siyam na pagkatalo sa 12 laban.
Sa ikalawang laro, bumanat si Kean Baclaan ng 13 points para sa 76-65 pagdaig ng National University sa UST.
Sinakmal ng Bulldogs ang 10-2 marka para muling makatabla ang Fighting Maroons sa itaas.
