1-0 lead asam ng Pampanga sa MPBL Finals | Pilipino Star Ngayon
MANILA, Philippines — Pag-aagawan ng Pampanga Giant Lanterns at ng Bacoor Strikers ang 1-0 lead sa Game One ng MPBL (Maharlika Pilipinas Basketball League) Fifth Season National Finals sa Bren Z. Guiao Convention Center sa San Fernando, Pampanga.
Nakatakda ang duwelo ngayong alas-7 ng gabi.
Paborito ang Pampanga, ang North Division champion, sa serye matapos walisin ang playoffs bukod sa paglalaro sa kanilang homecourt kung saan sila may 14-0 record.
Muling ibabandera ng Giant Lanterns sina Justine Baltazar, Encho Serrano, John Lloyd Clemente, MJ Garcia at veteran Arwind Santos.
Tatayong underdog ang Bacoor, ang South Division titlist, sa kanilang best-of-five championship series.
Sasandigan ng Strikers sina Jhaymo Eguilos, Jammer Jamito, Jhan McHale Nermal, James Kwekuteye, Michael Canete, Chito Jaime, Alwyn Alday, Aaron Jeruta, Yvan Ludovice, Mark Montuano at Mark Yee.
Hindi pa tinatalo ng Bacoor ang Pampanga sa apat nilang pagtutuosl simula noong 2019, kasama ang 70-78 kabiguan noong Setyembre 22.
Gagawin din ang Game Two sa San Fernando venue sa Nobyembre 28.