Nonoy nanguna sa top performers sa Draft Combine | Pilipino Star Ngayon
MANILA, Philippines — Bumida sina guard Mark Nonoy, forwards Brandon Ramirez at MJ Malonzo at center DJ Mitchell sa two-day PBA Draft Combine sa Ynares Sports Arena sa Pasig City.
Nanguna ang 5-foot-9 na si Nonoy sa mga skills test categories na 3/4 sprint test at running vertical jump sa itinala niyang 2.862 seconds at 53 inches, ayon sa pagkakasunod.
Ang tubong La Carlota, Negros Occidental ay dating naglaro sa University of Santo Tomas Growling Tigers bago lumipat sa La Salle Green Archers kung saan siya nanalo ng UAAP championship sa kanyang huling senior year sa nakaraang Season 86.
Samantala, nagposte ang 6’4 na si Ramirez ng 358 milliseconds sa reaction test habang tumipa ang 6’2 na si Malonzo ng 43 inches sa standing vertical jump.
Si Mitchell ay nanguna sa lane agility test sa kanyang bilis na 11.49 seconds.
Sa 62 aplikante ay si prospective top pick Justin Baltazar ang pinakamataas sa kanyang 6-foot-6 7/5 inches height kasunod si Kai Ballungay (6-foot-6 2/5) habang si Ronan Mendoza Santos ang may longest wing span na 81.5 centimeters.
Nakatakda ang Season 49 PBA Rookie Draft sa Linggo sa Glorietta sa Makati City kung saan ang Converge ang maghihirang sa No. 1 overall pick kasunod ang Blackwater (No. 2), Terrafirma (No. 3), Phoenix (No. 4), NorthPort (No. 5), NLEX (No. 6), Rain or Shine (No. 7 at 8), Magnolia (No. 9), Barangay Ginebra (No. 10), Meralco (No. 11) at San Miguel (No. 12).