Palabwanay sa ulug-ulog | Banat

Dihang nagsunod ang pagpasaka sa mga balaudnon sa P150 nga umento sa inadlaw nga suholan sa tanang trabahante sa tanang pribadong kompaniya sa tibuok nasud sa Senado ug House of Representatives sa niaging tuig, naglaom ang mga mamumuo nga modako na ang ilang kita.

Kay napasaka ang balaudnon sa Senado sa Marso ug ang sa House sa Abril, duna pay igong higayonan nga ma-apas aron mahimo nga makahuloganon ang pagsaulog sa Labor Day sa niaging tuig. Ug kay di ordinaryong mga magbabalaod ang nibarug isip mga kampeyon sa ilang kawsa.

* * *

Si Senate President Migz Zubiri ang nangamahan sa bersiyon sa Senado. Isip ikatulong labing taas nga opisyal sa nasud, lisod siya nga isnabon. Labaw na nga gipaluyohan sa tanang senador ang iyang balaudnon.

Sa pikas nga bahin, ang taga Liloan sa amihanang Sugbo nga si Deputy Speaker Raymond Mendoza ang nipasaka sa balaudnon sa House. Labaw sa iyang pagka presidente sa Trade Union Congress of the Philippines (TUCP), lisod balibaran sa mga kongresista si Mendoza kay uyoan siya ni Kongresista Yedda Romualdez, ang asawa ni House Speaker Martin Romualdez.

* * *

Pero bisan sa tanang mga pasalig niabot ug nilabay ang Labor Day 2023 nga wa matuki ang ilang mga balaudnon. Nipabuhi na sab og dugo si Zubiri nga himuon na lang nga kinatam-isan nga gasa sa Pasko 2023 para sa mga anak sa singot.

Liwas na sa Valentine’s Day naaprobahan sa Senado ang mas gamay nga P100 nga uminto. Ang pagpakahilom ni Mendoza gisapawan sa pasidaan sa mga ekonomista sa House nga ang uminto makadaot sa ekonomiya.

* * *

May nakahunghong tingali ni Romualdez nga ang pagsukwahi ug bisan ang pagkopya sa uminto sa Senado di makatabang kon mahinayon ang iyang kandidatura pagka presidente sa 2028, kalit lang nga nagkara-kara ang House sa pagtuon sa mas dakong uminto: P150 ngadto sa P350.

Bisan nahibawo na silang Zubiri ug Romualdez nga segurong ibasura sa Malakanyang ang bisan unsang uminto sa suholan nga maaprobahan sa Kongreso, kay di mosugot ang mga bilyonaryo nga naglibot sa presidente nga maibanan ang ilang ginansiya. Pero kay mga politiko man, padayon silang magpalabwanay–kinsa ang makapa-ukyab sa labing dakong ulug-ulog ngadto sa mga trabahante.

* * *

[email protected]