Robbins, Rep. Tolentino wagi sa POC Golf Cup | Pilipino Star Ngayon

MANILA, Philippines – Pinamunuan nina Ronald Robbins, Rep. Aniela Tolentino, Giro Tan at Aldrin Quinto ang mga nanalo sa 1st Philippine Olympic Committee (POC) Golf Cup para sa benepisyo ng National Athletes’ Trust Fund sa Luisita Golf and Country sa Tarlac.

Inangkin ni Robbins ng e-sports community ang Low Net at Low Gross trophies sa kanyang hinataw na 68 at 73, ayon sa pagkakasunod, para talunin si POC deputy secretary-general Valeriano “Bones” Floro — isang dating national junior champion — na nagtala ng 70 at 77.

Pinagreynahan ni Tolentino, ang Cavite 8th District representative, ang Ladies Division sa inilistang 73 (gross 98), habang may 79 at net 68 si Tan para mamuno sa Class A kasunod sina Philippine Football Federation (PFF) secretary-general Coco Torres (70-82) at Viktor Carlos (71-83) sa event na inorganisa ni POC President Abraham “Bambol” Tolentino.

Bumandera si Quinto ng Spin.ph sa Class B sa kanyang 102-74 kasunod sina Victor Diego (95-76) ng aquatics at Cedelf Tupas (95-76) ng PFF sa event na sinuportahan ng MVP Sports Foundation, Chooks-to-Go, Smart, PLDT, PTA, Asaphil, PhilCycling, PNVF, Philippine Aquatics Inc, Kickboxing Pilipinas, JSAP, PESO, Karate Pilipinas, PSTA, PNSA, NGAP, MTAP, PATAFA, Sambo Pilipinas, Kurash Federation of the Philippines, GAP, SRSAP, PFF, PJF, Vovinam Pilipinas, PEKAF, PRA, POSF, SBP at MBAP.

Si Hans David ng jetski ang naghari sa Class C sa kanyang net 74 (102) kasunod sina Jeffrey So Tiong (108-78) ng ice hockey at Tagaytay City Councilor Michael “Micko” Tolentino (110-78).