Semis ticket abot-kamay na ng Beda | Pang-Masa
MANILA, Philippines — Isang panalo na lang ang kailangan ng Red Lions papasok sa Final Four ng NCAA Season 99 men’s basketball tournament.
Humakot si big man Yukien Andrada ng career-high 26 points, 5 rebounds at 2 assists para pamunuan ang San Beda University sa 74-56 paglantak sa semifinalist Lyceum University of the Philippines kahapon sa FilOil Centre sa San Juan City.
Umiskor si guard Jacob Cortez ng 16 markers para sa 11-6 kartada ng Red Lions katabla ang St. Benilde Blazers sa third spot sa ilalim ng Mapua Cardinals (14-3) at Pirates (13-5).
Ang panalo ng San Beda sa talsik nang Letran sa Biyernes ang pormal na magpapasok sa kanila sa Final Four.
“Mas worried kami sa next game namin. Letran iyon eh, so kailangan naming paghandaan,” ani coach Yuri Escueta. “Walang bigayan doon.”
Tumipa si Enoch Valdez ng 17 markers, 7 boards at 1 assist sa panig ng Lyceum kasunod ang 14 markers ni Shawn Umali.
Samantala, isinara ng University of the Perpetual Help System DALTA ang kanilang kampanya sa 75-60 paglampaso sa sibak nang San Sebastian College-Recoletos.
Bumitaw si Jielo Razon ng 26 points, 7 rebounds at 3 assists para sa 10-8 baraha ng Altas at may 16 markers si Christian Pagara.
Bagsak ang Stags sa 5-12 marka at nakahugot kay Romel Calahat ng 19 points.
