Stopgap, Tofil mag-abot sa Buildrite Cup final | Banat
CEBU, Philippines — Ang Stopgap Sealants ug ang Tofil Finishing mitagak sa tagsa-tagsa nila ka mga kaatbang hinungdan nga sila maoy mag-abot sa kampiyonato sa Buildrite Cup nga gipasiugdahan sa Architects+Engineers Basketball didto sa Cebu Port Authority (CPA) Gym.
Si Joshua Gayotin mihipos og 18 puntos, unom ka rebounds, tulo ka assits, ug tulo ka steals sa dihang gipalagpot sa Stopgap ang Blockout Waterproofing pinaagi sa 63-56 nga desisyon. Nakakuha si Gayotin og dakong suporta gikan nilang Dexy Suico ug Noriko Benedicto nga mitali og 11 puntos matag usa.
Sa laing bahin, si John Gayotin mipabuto og 24 puntos uban ang pito ka rebounds sa dihang gipatikangkang sa Tofil ang Smartbond Flex Tile Adhesive, 65-62.
Si Arnel Cordero midugang og 11 puntos ug 10 ka rebounds samtang sila si Neil Tiempo ug Jaezon Estella nagkumboya'g 17 puntos alang sa Tofil.
Ang Stopgap ug Tofil gikatakda nga magbugno alang sa korona sa tinagakay nga duwa sa alas-7:30 sa gabii karong Sabado, Pebrero 17.