'The Kraken' mikumpleto sa bulawanon niyang koleksiyon | Banat

CEBU, Philippines — Ang bangiitang Sugbuanong atleta nga si June Mar Fajardo mikumpleto sa iyang koleksiyon sa bulawang medalya uban sa Philippine men's basketball team.

Kini human gitabangan sa 6'10" nga higante gikan sa lungsod sa Pinamungajan habagatang bahin sa Sugbo ang Gilas Pilipinas nga pakgangon ang Jordan, 70-60, niadtong Biyernes didto sa Hangzhou, China aron birahon ang unang Asian Games basketball gold sa nasud sukad niadtong 1962.

Ang kanhi three-time MVP ug back-to-back champion uban sa University of Cebu (UC) Webmasters atol sa iyang panahon sa Cebu Schools Athletic Foundation, Inc. (CESAFI) dako og naambag sa dihang gibisbisan sa mga Pinoy ang 61 ka tuig nilang huwaw sa bulawan sa torneyo nga mahitabo kausa lamang sud sa upat ka tuig.

Ang 33-anyos nga si Fajardo unang misakmit og gold sul-ot ang uniporme sa Pilipinas sa 12th Southeast Asia Basketball Association (SEABA) Championship nga giduwa didto sa Smart Araneta Coliseum sa Quezon City niadtong 2017. Ilang gitapos ang kompetisyon bitbit ang perpektong 6-0 rekord.

Duha ka tuig ang milabay, ang nine-time PBA champion, six-time MVP, ug eight-time All-Star kabahin sa national team nga nanghawod sa 30th Southeast Asian (SEA) Games diin ang nasud maoy host niadtong 2019. Ilang gikastigo ang Thailand sa final, 115-81.