UAAP, NCAA bakbakan sa Setyembre 7 | Pilipino Star Ngayon

MANILA, Philippines — Inaabangan na ang salpukan ng University Athletic Association of the Philippines (UAAP) at National Collegiate Athletic Association (NCAA) na sabay na magsisimula sa Setyembre 7 sa hiwalay na venues.

Lalarga ang UAAP Season 87 sa Smart Araneta Coliseum kung saan masisilayan ang banggaan ng apat na koponan na mag-aagawang makuha ang opening game win.

Inaasahang ilalatag din ang makulay na opening ceremonies bago simulan ang dalawang laro sa men’s basketball tournament.

Sisimulan ng reigning champion De La Salle University ang pagdepensa sa korona na napanalunan nito noong nakaraang taon matapos igupo ang University of the Philippines sa best-of-three championship series.

Tatayong season host ang UP.

Sa kabilang banda, aarangkada naman ang ika-100 edisyon ng NCAA sa MOA Arena sa Pasay City.

Inaasahang magarbo ang pagdaraos ng ope­ning rites ng NCAA lalo pa’t magdaraos ito ng centennial year.

Wala pang eksaktong detalye ang pamunuan ng NCAA sa magiging programa nito.

Subalit usap-usapan na ang pagbibigay-pugay nito sa ‘100 Greatest Players’ na naging icon sa larangan ng sports na mula sa pinakamatandang liga sa bansa.

Magsisilbing season host naman ang Lyceum of the Philippines University.