Panthers miwani sa Jaguars sa OT | Banat
CEBU, Philippines — Ang University of Southern Philippines Foundation (USPF)Panthers mipiog sa University of San Jose-Recoletos (USJ-R) Jaguars sa overtime, 63-55, aron pahayagan ang ilang tansa nga mo-abante sa Final Four sa Cebu Schools Athletic Foundation, Inc. (CESAFI) Season 23 Men's Basketball Tournament niadtong Sabado sa gabii didto sa Cebu Coliseum.
Sa dalaygong one-man show, si Winston Bingil mipabuto og 33 puntos, apil na ang krusyal niyang 3-pointer sa pinal nga 24 segundos sa regulasyon nga nakapatabla sa iskor, 53-53, hinundan sa overtime.
Ang Panthers padayong mipakita sa ilang katakos sa dugang singko minutos sa aksiyon diin ilang giposasan ang Jaguars ngadto lamang sa dos puntos samtang sila mikadlit og 10 puntos aron angkonon ang dakong daog nga nagduso kanila ngadto sa ikatulong puwesto sa college division standings uban ang 6-2 rekord.
Ang Jaguars, nga miduwa nga wala ang kontrobersiyal nilang player nga si Evan Jose "EJ" Agbong sa ikaduhang sunod-sunod nga higayon sukad ang CESAFI mi-isyu og opisyal nga pamahayag kabahin sa kuwestiyonable niyang eligibility, natagak sa ikaupat nga dapit bitbit ang 6-3 nga baraha.
Sa laing bahin, si Kyle Maglinte mipatuasik og 25 puntos aron pangulohan ang Southwestern University (SWU)-Phinma Cobras ngadto sa 69-47 nga demolisyon sa Felipe R. Verallo Foundation College (FRVFC) Blue Dragons.
Ang Cobras nagkupot na karon og 3-6 nga marka samtang ang Blue Dragons nagtingkagol sa kinatumyang bahin uban ang usa lamang ka daog sa siyam ka duwa.
