HomeSourced, TTEC Dragons mihimo'g kasaysayan | Banat
CEBU, Philippines — Ang HomeSourced, Inc. ug TTEC Dragons mikulit og kasaysayan isip labing unang mga kampiyon sa Hoop Nation Inter-BPO Basketball League nga gipaluyohan sa Hype Pro Cebu didto sa City Sports Club-Cebu gym.
Nakabawi ang HomeSourced gikan sa mabugnaw nga sinugdanan aron kastigohon ang Newfold Wolves, 98-88, ug langkaton ang titulo sa West Division.
Si James Villafuerte misidlak nga labing hayag sa Newfold Wolves uban ang 21 puntos, walo ka rebounds, upat ka assists, duha ka steals ug usa ka block hinungdan nga siya maoy gibayaw nga West Finals MVP.
Ang HomeSourced naalkansi og siyete puntos sa sayong bahin, 21-28, apan dali nga nakatabla sa halftime, 48-48l, sa wala pa gi-ilog ang labaw, 76-69, sa hingpit.
Si Ralph Belarmino mipupo og 20 puntos, 11 ka rebounds, upat ka assists ug duha ka steals sa pilderong Newfold.
Sa laing aksiyon, ang TTEC Dragons mipaluhod sa SVC Bulldogs, 74-66, aron birahon ang korona sa East Division.
Si Kenneth Cada miharos og double-double nga 18 puntos ug 12 ka rebounds uban ang duha ka blocks ug usa ka steal hinungdan nga siya maoy gipasidunggan nga East Finals MVP.
Ang Dragons kanunay nga naggukod apan milusad og mainit nga resbak sa katapusan kuwarter diin ilang gikulata ang Bulldogs, 19-7, aron pagkab-ot og dalaygong singko puntos nga pag-eskapo. Si Aristotle Alcos mitali og 17 puntos, lima ka assists, lima ka rebounds ug duha ka steals apan nakawang ang iyang paningkamot sa habig sa Bulldogs.
