Academy ni Hidilyn Diaz sinisimulan na | Pilipino Star Ngayon

MANILA, Philippines – Matutupad na ang pangarap ni Tokyo Olympics gold medalist Hidilyn Diaz na magkaroon ng weightlifting academy upang tulungan ang mga bagitong atletang nais sumunod sa kanyang yapak.

Pormal nang nagkaroon ng groundbreaking ang HD Weightlifting Academy na nasa Jala-jala, Rizal, na magsisilbing tahanan ng mga batang weightlifters sa pagsasanay nito.

“This is just so important to me, as I prepare for the Paris 2024, I have a place to train together with the kids who dream to be in the national team, be a world champion and Olympic medalist,” ani Diaz.

Ibinahagi ni Diaz sa kanyang social media ang pagsisimula ng konstruksiyon ng academy kasama ang ilang kabataang weightlifters.

Kasama rin ni Diaz sa simpleng programa ang asawa nitong si Julius Naranjo na siya ring tumatayong coach ni Diaz sa kanyang training camp.

Inaasahang matatapos ang konstruksiyon sa loob ng apat na buwan.

Ito rin ang magiging training venue ni Diaz sa paghahanda nito para sa 2024 Paris Olympics.

“We can’t wait to see, hopefully, after four months, from the temporary gym to our soon-to-be training camp preparing for the Paris Olympics, and joining us the soon to be weightlif­ting champions!” ani Diaz.

Suportado naman ni Naranjo ang bawat hakbang ni Diaz dahil matagal na itong pangarap ng Olympic champion.

Nais ng mag-asawa na maibahagi ang kanilang kaalaman sa mga batang atleta upang makahubog ng mga bagong world champions sa mga susunod na henerasyon.