Altas nakatutok sa ika-3 dikit na panalo | Pilipino Star Ngayon
MANILA, Philippines — Ang ikatlong sunod na ratsada ang pakay ng University of Perpetual Help System DALTA sa pagsagupa sa San Beda University sa NCAA Season 99 men’s basketball tournament sa Filoil Centre sa San Juan City.
Nakatakda ang bakbakan ng Altas at Red Lions ngayong alas-2 ng hapon kasunod ang pagtutuos ng Lyceum of the Philippines University Pirates at Jose Rizal University Heavy Bombers sa alas-4 ng hapon.
Solo ng Mapua ang liderato tangan ang 6-1 marka sa itaas ng Lyceum (6-2), San Beda (4-2), Emilio Aguinaldo College (4-3), Jose Rizal (4-3), St. Benilde (4-3), Perpetual (3-4), San Sebastian (3-4), Arellano (1-6) at ‘three-peat’ champions Letran (0-7).
Nagposte si Jun Roque ng 22 points, 11 rebounds, 2 assists, 2 steals at 2 blocks sa 74-59 pagbugbog ng Altas sa Knights na kanilang pinaulanan ng 12 three-point shots.
“I think this is the first time na maganda iyong shooting namin sa stat sheets eh,” sabi ni Perpetual coach Myk Saguiguit.
Nagmula naman ang San Beda sa 74-70 pagtakas sa Jose Rizal kung saan nagposte si guard Jacob Cortez ng career-high 24 points bukod sa 5 rebounds, 2 assists at 4 steals.
Sa ikalawang laro, mag-uunahan ang Pirates at Heavy Bombers sa pagbangon sa kani-kanilang kamalasan.
Matapos ilista ang 6-0 record ay nahulog ang Lyceum sa dalawang sunod na kamalasan kagaya ng nalasap ng Jose Rizal.